ਗੁਰਦੁਆਰਾ ਅੰਤਰਯਾਮਤਾ ਸਾਹਿਬ ਉਸ ਇਤਿਹਾਸਕ ਮਸੀਤ ਦੇ ਸਥਾਨ ‘ਤੇ ਸੁਸ਼ੋਭਿਤ ਹੈ ਜਿੱਥੇ ਗੁਰੂ ਨਾਨਕ ਦੇਵ ਜੀ ਨੇ ਨਵਾਬ ਅਤੇ ਕਾਜ਼ੀ ਨੂੰ ਮਨ ਦੀ ਇਕਾਗਰਤਾ ਅਤੇ ਸੱਚੀ ਇਬਾਦਤ ਦਾ ਸੰਦੇਸ਼ ਦਿੱਤਾ ਸੀ।
ਜਦੋਂ ਗੁਰੂ ਸਾਹਿਬ ਨੇ “ਨਾ ਕੋਈ ਹਿੰਦੂ, ਨਾ ਕੋਈ ਮੁਸਲਮਾਨ” ਦਾ ਬਚਨ ਕੀਤਾ, ਤਾਂ ਉੱਥੋਂ ਦੇ ਮੁਸਲਮਾਨ ਕਾਜ਼ੀ ਅਤੇ ਨਵਾਬ ਦੌਲਤ ਖਾਂ ਨੇ ਇਤਰਾਜ਼ ਕੀਤਾ। ਉਨ੍ਹਾਂ ਨੇ ਗੁਰੂ ਸਾਹਿਬ ਨੂੰ ਕਿਹਾ ਕਿ ਜੇਕਰ ਤੁਸੀਂ ਸਭ ਨੂੰ ਬਰਾਬਰ ਮੰਨਦੇ ਹੋ, ਤਾਂ ਸਾਡੇ ਨਾਲ ਮਸੀਤ ਵਿੱਚ ਨਮਾਜ਼ ਅਦਾ ਕਰੋ। ਗੁਰੂ ਸਾਹਿਬ ਉਨ੍ਹਾਂ ਨਾਲ ਚਲੇ ਗਏ।
ਜਦੋਂ ਨਮਾਜ਼ ਸ਼ੁਰੂ ਹੋਈ, ਤਾਂ ਕਾਜ਼ੀ ਅਤੇ ਨਵਾਬ ਨਮਾਜ਼ ਪੜ੍ਹਨ ਲੱਗੇ ਪਰ ਗੁਰੂ ਸਾਹਿਬ ਸਿੱਧੇ ਖੜ੍ਹੇ ਰਹੇ। ਨਮਾਜ਼ ਖ਼ਤਮ ਹੋਣ ਤੋਂ ਬਾਅਦ ਜਦੋਂ ਕਾਜ਼ੀ ਨੇ ਨਾਰਾਜ਼ਗੀ ਜ਼ਾਹਰ ਕੀਤੀ ਕਿ ਗੁਰੂ ਸਾਹਿਬ ਨੇ ਨਮਾਜ਼ ਨਹੀਂ ਪੜ੍ਹੀ, ਤਾਂ ਗੁਰੂ ਸਾਹਿਬ ਨੇ ਮੁਸਕੁਰਾ ਕੇ ਉੱਤਰ ਦਿੱਤਾ: “ਤੁਹਾਡੇ ਵਿੱਚੋਂ ਕੋਈ ਵੀ ਨਮਾਜ਼ ਨਹੀਂ ਪੜ੍ਹ ਰਿਆ ਸੀ। ਕਾਜ਼ੀ ਸਾਹਿਬ, ਤੁਹਾਡਾ ਸਰੀਰ ਇੱਥੇ ਸੀ ਪਰ ਮਨ ਘਰ ਵਿੱਚ ਨਵੀਂ ਜੰਮੀ ਵਛੇਰੀ (ਘੋੜੀ ਦੇ ਬੱਚੇ) ਬਾਰੇ ਸੋਚ ਰਿਹਾ ਸੀ ਕਿ ਉਹ ਕਿਤੇ ਵੇੜ੍ਹੇ ਦੇ ਖੂਹ ਵਿੱਚ ਨਾ ਡਿੱਗ ਜਾਵੇ। ਨਵਾਬ ਸਾਹਿਬ, ਤੁਹਾਡਾ ਮਨ ਕਾਬਲ ਦੇ ਬਾਜ਼ਾਰਾਂ ਵਿੱਚ ਘੋੜੇ ਖਰੀਦ ਰਿਹਾ ਸੀ।”
ਇਹ ਸੁਣ ਕੇ ਨਵਾਬ ਅਤੇ ਕਾਜ਼ੀ ਹੈਰਾਨ ਰਹਿ ਗਏ ਅਤੇ ਗੁਰੂ ਸਾਹਿਬ ਦੀ ਅੰਤਰਯਾਮਤਾ (ਮਨਾਂ ਦੀਆਂ ਬੁੱਝਣ ਵਾਲੀ ਸ਼ਕਤੀ) ਅੱਗੇ ਸਿਰ ਝੁਕਾ ਦਿੱਤਾ।